Blog

Annina Giovanoli
Das mit am Mäntig Jo das isch so a Sach mit dem Mäntig. Eigentlich isch es jo a tolli Sach wenn ma da Erschti darf sie. Und das isch jo schliesslich da Mäntig. Da erschti Tag vor Wucha. Aber wer bestimmt eigentlich, dass a Wucha genau mit am Mäntig afanga muass? Es könnt doch grad so guat da Mittwuch si. Aber nei, seb got jo nid. Denn wür d’Wucha jo z’mitzt in der Wucha afanga und denn gengt’s nüm uf. Obwohl, ma könnt jo vor Mitti zur Mitti rechna und denn hett ma au wieder a Ganzes. Oder miar fangend d Wucha am Fritig a. Denn hetti ma nid mit da Afangsschwierigkeita vom Mäntig z kämpfa und könnt d Wucha grad direkt mit am Wuchaend afanga.

Aber wer will scho grad mit am Endi afanga. As Endi isch nämli da Schluss und wenn miar üsi Wucha tetend mit am Wuchend afanga, denn wär jo d Wucha scho wieder z’end bevor sie recht agfanga hät, und das got also würklich nid. Denn könnt ma höchstens a Wucharückblick macha – also zrugg luaga uf a Wucha, denn wür ma automatisch au über da Mäntig stolppera und müasst nid jedi Wucha mit ma Mäntig afanga, well ma jo die letscht Wucha scho eine ka hät, also sprich agluagt hät und denn wär da letschti Tag vor Wucha au grad automatsich wieder da erscht.

Aber eigentlich isch es jo egal ob hüt Mäntig, Mittwuch oder Fritig isch. Hauptsache es isch. Dermit mein i – hauptsach isch as an Tag vo minem Läba wo i darf zu mim Tag macha. Dass es Mäntig, Mittwuch oder Fritig isch liet nid in minera Hand, aber obs an guata Mäntig, Mittwuch oder Fritig wird, seb liet sehr wohl in minera Hand. Und wenns mir nid grad vo Afang a glingt, dass es an guata Mäntig wird, denn han i jo denn immer no an Zischtig für allfälligi Verbesserigsmöglichkeita. So glingt miar denn eventuell da Mittwuch besser, dermit i mit Vorfreud darf da in da Donnschtig starta um mit Elan da Fritig z plana dermit i mi am Wuchende darf uf a glorricha Mäntig freua.
Annina Giovanoli
Haldenstein, 12. März 2018