Blog

Annina Giovanoli
Punkt und Komma Eigentlich sött ma nid schriba, wenn eim gar nüt zum schriba ifallt. Aber d Buachstaba könnd jo nüt derfür, dass eim nüt richtigs ifallt. Und i findas schad, wenn ma d Buachstaba denn eifach nid nutzt nu well ma nid weiss was ma söll grad schriba. Denn wenn ma mol agfanga het Buachstaba an Buachstaba ananand reiha, denn merkt ma uf z mol, dass ma doch öppis z säga het. Und wenn s nu isch, dass eim nüt gschieds ifallt. Aber muass es denn immer gschid si? Kann s nid eifach mol nu so für ungschied si, eifach so wias grad kunnt und wia d Finger grad über Tastatur zurrend. Das mit dem Tastaturzurra isch nämlich so a Sach.

Bsunders wenn i dra denka, dass i eigentli gar nid Tastaturschirba glernt han und i eigentli au gar nid behehrrscha, jo halt eifach well is nia glärnt ha. Aber heisst denn das jetzt, dass wenn ma öppis nid glärnt het, denn zwangsläufig das au nid kann? I han zum Biespiel nia recht glärnt schrieba. I bin a grauahafti gramatikalischi Nuss und wür hüt no gera ständig an H döt inna hänka wo er nid inna khört oder zwei RR aswo ahänka wo s nu eina brucht. Au das mit da Komma isch a Gschicht für sich und erscht recht das huara Trara um dä Genitiv. Selbscht jetzt weiss i nid ob sich dä keiba Genitiv mit ma F oder doch mit ma V am Schluss schriebt. G E N I T I F (V)?

I könnt jo jetzt s Fräulein Google fröga, maches aber nit, denn i find es hät sin Reiz mit ma F und au mit ma V. Punkt! Jo, da Punkt de setzt i immer am richtiga Ort. Er kunnt am Schluss. Das han i glärnt und erscht no kapiert. Ma kann ihn au nit falsch schrieba, da Punkt. Er isch verbindlich und zeigt immer a wenn an Satz fertig isch. Anderscht als das blöda Komma wo grad kunnt wenn s will. Also be miar. I finda, s Komma isch völlig indifiduell kommatierbar. Es isch jo schliesslich au as Komma und kein Punkt. Wenn i nämli ganz ehrli bin, denn schrieba i sowieso alles nu mit zwei Finger. Was heisst do nu? Nu wär bitz wenig.

Aber i finda mini zwei Finger tüand da ganz Tag meh al nu wenig. Ganzi Theater schriebends. Und unzähligi Gsuach klipperndes ufs Papier. Jo vo öppisem muass i jo au mini Zit zum Schrieba finanziera. Also schrieb i Gsuach. Wenn i ehrlich bin, denn schrieba i viel me Gsuach, als was i Antworta druf bekumma. Viellicht sött i do mol as paar Pünkt meh macha. Aber was kann i denn derfür, dass mir mini Ideea nid usgönd? Und well dia Ideea immer grad denn inna kömmend wenn i eigentlich no am umsetzte vo da vorletschta Ideea bin, denn git s eba as Gnusch mit denna keiba Komma. Drumm kumm i jetzt für hüt zum Punkt und mach an Punkt bevor is mir wieder anderscht überlegga. Punkt.
Annina Giovanoli
Haldenstein, 30. April 2018