Blog

Annina Giovanoli
Sammeln sie auch? Was für a Euphorie, was für a Hantierig! Egal ob im Volg, im Coop, in der Migros oder im Vilan. Upps, da Vilan isch jo scho lang nüm dr Vilan. Manor, natürlich, so ha i gmeint. Also nomal. Egal ob im Volg, im Coop, in der Migros oder im Manor, überall lachend eim irrgendwelchi rot wiess gmuschterti Multichipspackiga und Zwölferkischtli mit Bier a. Mol abgseh dervo, dass ma im Lidl am Tag noch am legendära Doppeladlerflug nid nu uf d Pouletflügeli sage und schreibe 20 Prozent Rabatt ka hät, hät ma au in andera nationala Ladakettina wacker ufgrüschtet. Als Dank für dia achtelfinalistischi Heldatat hät Coop ihri Superpünkt verdopplet. Jo, as sind schliesslich au zwei Coal gsi und Aldi Schwiiz hät sofort Kontakt zu allna Bio Knobli Produzenta us am Berner Seeland ufgno. Migros hätt Überraschigsköfferli verlost und mit viel Glück hät ma könna as Candellligthdinner mit am Xerdan Shaqiri in der Nachttischliabteilig vo Micasa gwinna.

Aber egal in wellem Grossverteiler ma sich grad ufhaltet, eis isch sicher; ob Papierservietta oder WC Papier, Schwizerkrüzli muass es druf ha. Senftubena mit rot wiessa Fuassbäll und Essiggurka vor Marka Chirat, verschlossa mit Schwiizerkrütz verziartem rotem Blächdeckel, Grillzanga mit Hopp Schwiiz und die derzua passenda Grillschala us Aluminium stapplend sich zwüschet Äschabecher, Platzsett, Sitzküssi, Biergläser, Zündhölzli, Fähnli und Partybelüchtig. Und alles in üserna urschwizer Nationalfarba. Als ob dä nationali Säga no nid gnuag wär, entdeck i au no als Fuassball tarnti kochti Picknick Eier grad näb da deckelibeflaggta LC 1 Jogurth.

Mol abgseh, dass sich all dia vakumierta Cervelat Achterpäck im Küahlregal, neb da mit Hopp Schwiz beschrifteta Poultebrüschtli us Dütschland sicherlich sehr blöd vorkömmend, han i denn mit da klina rot wiessa Babybell Käsli us Holland scho richtig Verbarma. Eigentlich sött ma dia ins Gschtell vo da italienischa Babytomätli legga, dermit sie sich mit da Gurka us Spania und da portugisischa Bluatoranga bitz könnd ustuscha. Und well miar dia Muatter, wo sich mit ara junga Verkäuferi wäg da usgangna Schwiizer Autorückspiegelfähnli strietat, grad so richtig leid tuat, legg i ihra heimlich as Päckli Wasa Knäckebrot ins Wägeli und begib mich an d Kassa wo mi a netti dütschi Verkäuferi charmant mit: «Sammeln sie auch Paninibildchen?» verabschiedat.
Annina Giovanoli
Haldenstein, 7. Juli 2018