Ü-50ig Thja, jo in minem September Blog han i grossartig vo fit und so gschrieba. Wenn i miar das nomal so richtig überlegga, denn isch es äba glich nid so ganz wohr. Gosch zum Optiker, well s Gfühl häsch, dini Brilla seg ständig liacht staubig, denn klickt dä in sinem Compiuter in Taschta und frogt; „ Annina Giovanoli, Haldastei?“ I nicka und er seit: „Jo gällend Sie, mit über 50ig nämend d Auga halt ab!“ OK, denka i, denn nimmt wenigstens öppis ab und i laufa tapfer als Ü-50igeri zum Lada ussa, überquera d Stross und mach no kurz an Abstecher ins Reformhus übera. Eigentlich wett i nu mini Flosama go hola. (Flohsama sind darmregulierend, muass i do kurz erwähna) Und scho quatscht mi so a ussaputzti Komposchtgumsla. Jo halt eini, wo ma uf da erscht Blick gseht, dass sie sich für da Rescht vo ihrem Läba an der Sieta vo ihrem Yogalehrer besser fühlt, als im na lismenda Frauaverein.

„Hälfend Ihna dia Sama?“ wett sie wüssa. Und bevor i weder zum nicka, no zum mis Mul z öffna kumma seit sie: „mit der rechta Dossierig könnd sie in dr Wucha bis zu zwei Kilo verlüra!“ Für mi sind dia Flohsama lediglich as simpels und praktischs Nahrigsergänzigsmittel, so im Müasli oder so. Aber dia Bambussockaträgerin git grad no eina druf und seit: „ Jo, ab 50ig sött ma unbedingt zwei bis drei Mol im Johr an Darmilauf macha! Das zücht alles Gift us eim ussa, entschlackt und reinigt…………….i bin letscht Johr zwei Mol im na Seminar gsie und sit dua weiss i dass mir eigentlich viel meh mit am Darm als am Hirni denkend und……“ i ha mini Flohsama wieder is Gstell zrugg gschoba und bin zügig zum Lada us.

Dahei ako, gang i zum Briefkaschta. Au für mi isch Poscht derbie und i öffna dä Briaf und was züch i zum Couvert ussa? „Mit dieser Einladung erhalten Sie, werte Frau Giovanoli, einen persönlichen Termin für Ihre nächste Mammografie!“ I glaub i spinna. Jo, i bin a Ü - 50igeri, aber in minem obera Stübli han i no alli mini Krälleli be anand und weiss no, mit wem i wo und wenn an persönlicha Termin abgmacht han.

I läsa wieter: „alle Frau ab 50 erhalten in Graubünden den von uns profisorisch abgemachten Termin per Post zugestellt und dürfen…………“ Do kann i jetzt echt nu no da Kopf schüttla! Blosend miar doch alli in d Schua han i denkt. I mach da Küalschrank uf, stell da Radio a und fang a Zmittag kocha. „………..s Risiko ab 50ig isch eidütig grösser wenn…………“ I werda hellhörig, stell da Radio bitz lüter: „……….und drum sind d Überläbendschance absolut besser wenn ma ab 50ig regelmässig a Koloskopie macht!“ Amen. Han i denkt und da Radio abgstellt. Bin in da Keller, han a Fläscha Prosseco ufa gholt, da Kochschoss abzoga und miar as Glas voll bis under da Rand igschenkt. Viva!