Blog

Annina Giovanoli
Ziet heilt alli Wunda Im Auguscht 2018 bin i uf übelschti Art und Wiess zu ma grossa Theaterprojekt ussa gfloga! Intriga kennend kei Grenza! Pampf häts gmacht und i han eini vo mina gröschta Ohrfiega in mimen Theaterschaffa als Regisseurin kassiert. An Stell vom abgmachta Honorar Hohn und Spott! 10 Monat Arbeit für Katz. Dä Rausschmiss isch so grusig gsi, dass i mi sälber z gära han, zum für mis Recht und mini Rapa z kämpfa und so isch Füraluaga agseit gsi. Und das han i gmacht! Us dem Füraluaga isch a neus Projekt entstanda. Far da las bellas am Arcas. A Wiahnachtslada uf Ziet. A Ziet voll vo Farba, Glanz und ganz viel neua Gschichta. Was i in minem Lada uf Ziet im Arcas erläbt han, das wett i nüm missa. I han Menscha troffa wo`s eifach schad gsie wär, wenn i denna Menscha nia begegnet wär. Mengisch isch es a eifachi und simpli Begegnig gsi. Mängsich isch us derra Begegnig meh worda und dia Menscha sind regelmässig in mina Lada ko. I han Gschichta erfahra, han dörfa zualosa und zualosa und zualosa. Mis Lada Agebot hät d Menscha zum Verzella animiert und as isch mir klar worda, wia viel Läbensgschicht im na eifach verbülta Milchkesseli liet.

I han dörfa erfahra wia`s gsi isch wo da Milchmaa no dur Khur zoga isch und wo ma mit da Ski vo Brambrüasch no bis ins Welschdörfli hät könna fahra. I han Konfermationsgschichta und Scheidigsgschichta verzellt kriagt. In mimenmLada hät ma sich gstritta und sich au wieder versöhnt. I han regelmässiga Bsuach vo ma alta Ma us am Altersheim ka und i ha regelmässiga Bsuach vo ma Maitli us am nocha Kindergarta ka. Die alt Klürribahn isch ständig in Betrieb gsi und menga Vater hät vo sinem alta Bauklötzlikaschta verzellt. Min Lada uf Ziet isch buachstäbli as Zietprojekt worda und mit all denna Gschichta isch miar bewusst worda, wia wichtig mis Projekt miar selber und au ganz viel andera Lüt worda isch. Dass däjenig, wo verantwortlich gsi isch für mina Rausschmiss vom Auguscht 2018, jeda Tag hät müass uf sinem Weg zur Arbeit, an minem Lada uf Ziet verbie laufa, isch wohl meh als nu a Wink vom Himmel gsi. Was er drus glärnt hät, das weiss i nit. Was i aber us alle dem han dörf lärna, das weiss i sehr wohl.
Annina Giovanoli
Haldenstein, Dezember 2018